უძველესი ბრიტანელი ფერადკანიანია! ლონდონის ბუნების ისტორიის მუზეუმის მეცნიერებმა 1903 წელს ბრიტანეთში, სომერსეტში, ჩედარის ხეობაში ნაპოვნი ადამიანის შიდა ყურიდან დნმ-ს ნიმუში აიღეს და თანამედროვე ტექნოლოგიების დახმარებით მთლიანი გენომის გაშიფვრა შეძლეს.

2018 წლის 7 თებერვალს ცნობილი გახდა, რომ ბრიტანეთში აღმოჩენილი უძველესი ჩონჩხის  პატრონს, ჩედარის ადამიანს, მუქი ფერის კანი, ცისფერი თვალები და ხვეული თმა ჰქონდა.

ჩონჩხი მეზოლითს ანუ შუა ქვის ხანას ეკუთვნის. ის ძალიან ჰგავს მონადირე-შემგროვებელი ტიპის ადამიანებს, რომელთა ჩონჩხები ესპანეთში, უნგრეთსა და ლუქსემბურგში აღმოჩინეს.

„ეს გამაოგნებელი აღმოჩენაა, (...) რომელიც გვახსენებს, რომ ყველანი სადღაც აფრიკიდან მოვდივართ“- ამბობს საიმონ ანდერდაუნი, ანთროპოლოგი ოქსფორდ ბრუქსის უნივერსიტეტიდან. მეცნიერები ვარაუდობენ, რომ თეთრკანიანი ადამიანები ევროპის ტერიტორიაზე ახლო აღმოსავლეთიდან მოვიდნენ. კანის ფერს კი მათ კვების რაციონში D ვიტამინის კონცენტრაცია  განაპირობებდა. ახლო აღმოსავლეთის ადამიანები მარცვლეულით იკვებებოდნენ, რომელიც  ამ ვიტამინს დიდი რაოდენობით არ შეიცავს. ამის გამო, განუვითარდათ  კანის თეთრი ფერი, რომელიც ადვილად შთანთქავს ულტრაიისფერ სხივებს და D ვიტამინს ასინთეზებს. დანარჩენებს კი D ვიტამინის სინთეზი არ სჭირდებოდათ, რადგან თევზიდან და ხორციდან საკმარისს იღებდნენ. „ვფიქრობ, უკვე ყველამ იცის, რომ (...) არანორმალურად დიდ ყურადღებას ვანიჭებთ ჩვენი კანის პიგმენტაციას“-თქვა სტივ კლარკმა, დოკუმენტური გადაცემის წამყვანმა, რომელმაც ახალი აღმოჩენა თანამედროვე რასიზმის პასუხად გამოიყენა.